WAA MAXAY TALLAAL? INTEE IN LE`EGSE AYUU MUHIIM YAHAY?

Intabadan tallaalka waxaa ku jira xaddi yar oo bakteeriya, fayras iyo sun la wiiqay ama lagu burburiyay sheybaarka ka hor inta aan la baahin nuuca tallaalkaas

Qaar kamid ah waxaa ku jira kiimikooyin ka dhigaya jirkaaga inuu u maleeyo iney la xiriirto bakteeriya, fayras ama sun

Macna ahaan taasi waxa ay ka dhigan tahay iney jirto Qatar aad u yar oo dadka caafimaadka qaba kaga imaan karta tallaalka

Haddaba maxaa tallaalku muhiim u yahay iyo habka ugu bad baadsan ee aad naftaada u ilaalin karto?

Su`aashaas jawaabteeda oo faahfaahsan iyo macluumaad kale oo ku lifaaqan ayaan doonaya maanta inaan ku qaadaa dhigo qormadaan haddii Eebe SWT uu ka raali noqdo

Tallaaladu waa habka ugu waxtarka badan ee looga hortago cudurro badan oo faafa, waxaana maqaalkaan ku sharaxi doonnaa sida ay ushaqeeyaan tallaaladu, waxa ay ka kooban yihiin iyo waxyeelada ugu badan ay lee yihiin

Ka foojignow sheekooyinka ka hortagga tallaalka

Sheekooyinka ka hortagga tallaalka ayaa intabadan lagu faafiyaa onlaynka iyadoo loo siimarayo baraha bulshada iyo qaabab kale oo ka duwan

Had iyo jeer ka qaado tallaalka iyo macluumaadka caafimaad ilo aad ku kalsoon tahay

Macluumaadka tallaalka ee baraha bulshada waxaa laga yaabaa inaaney ku saleysnayn cadeyn cilmiyeysan oo waxa ay kuu horseedi kartaa halis caafimaad oo laga baaqsan karay

Dhammaan cadeymaha hadda jira waxa ay inoo sheegayaan in tallaalku ka bad baado badan yahay in aan tallaal la qaadan

Waxyaabaha aad u baahan tahay inaad ka ogaato tallaalada

Tallaalka ayaa ah caawimaad sidii adiga iyo ilmahaaga aad uga bad baadi lahaydeen cudurro badan oo halis ku ah caafimaadkiina

Ilaali dadka kale ee qoyskaada iyo bulshadaada adiga oo gacan ka geysanaya joojinta cudurrada ku faafa dadka aan la talaali Karin sida dhallaanka aadka u yar ee aan la tallaalin iyo kuwa aadka u xanuunsan ee aan tallaalka qaadan karin

Tallaalku waxa uu soo maraa tijaabooyin badan oo bad baadin ah kahor inta aan la soo bandhigin sidookale si joogta ah ayaa loola socdaa waxyeelada soo raacda kadib marka la soo bandhigo taasoo muujineysa in lagu dadaalayo markasta hubinta tayada iyo waxtarka tallaalka

Mararka qaarkood tallaalada waxa ay keenaan waxyeelo qafiif ah oo aan sii socon doonin islamarkaana waxaa suuragal ah inaad dareento xoogaa caafimaad darro ah oo aad cudud ka xanuunsato laba ama saddex maalmood

Tallaalka waxa uu sabab u noqonayaa in la yareeyo ama laga taqalluso cudurrada qaarkood waa haddii dadka badankood tallaalka si wanaagsan u qaataan

Tallaalka kuma jiraan ama kama sameesna wax xad dhaaf ah oo qofka caafimaadkiisa dhibaateen kara ama hoos u dhigi kara hab difaaca jirka waana arrin wanaagsan in caruurta iyo dadka waaweenba laga tallaalo xanuunada halista galin kara bad qabkooda

Sababta ay tallaaladu muhiim u yihiin

Tallaalku waa waxa keliya ee aan sameen karno si aan nafteenna iyo caruurteenna uga ilaalinno caafimaad darro

Waxa ay ka hortagaan malaayiin cudurro ah oo sababa dhimasho adduunka dhan ah sannad walba

Tan iyo markii la soo bandhigay tallaalada cudurro ay kamid yihiin furuqa, dabeysha iyo teetanada oo dili jiray ama naafeen jiray malaayiin qof ayaa hadda meesha ka baxay iyadoo ay naadir tahay in cudurradaasi la arko waqtiyadaan

Cudurrada kale sida jadeecada iyo gowracatada ayaa hoos u dhacay illaa tiro aad u yar oo kiisas ah sannadkiiba tan iyo intii la helay tallaalka waxaana lagu waramayaa in kiisaskaas intabadan ay yihiin kuwa la xiriiraan safarrada dadka ay isugu kala gooshaan

Sikastaba ha ahaatee haddii dadku ay joojiyaan tallaalka waxaa suuragal ah in cudurrada faafa ay si dhaqsa ah sara ugu kacaan iyadoo xog laga soo xigtay hay`adda caafimaadka adduunka ee marka magaceeda lasoo gaabiyo loo yaqaano WHO ay sheegeyso in kalaba labeenta qaadashada tallaalka ay tahay mid kamid ah qataraha ugu weyn ee caafimaadka adduunka

Sida tallaaladu u shaqeeyaan

Tallaaladu waxay barayaan hab difaacaaga sida loo abuuro unugyada difaaca jirka ee iska caabiya cudurrada

Aad bey uga bad baado badan tahay tan tallaalka uu ku barto marka loo eego in cudurka la baaro misna la iska daweeyo

Marka hab difaacaada uu barto sida loola dagaalamo cudurka, wuxuu intabadan ku siin karaa hab difaac waqtigiisu raagi karo

Haddii dadka badankiis la tallaalo cudurka waa ay ku adag tahay inuu ku faafo dadka aan la tallaali Karin sida dhallaanka yare e aan wali tallaal qaadan iyo dadka hab difaaca jirkoodu liito ee aan tallaalka xamili Karin

Bad baadada tallaalka

Dhammaan tallaalada si fiican ayaa loo tijaabiyay si loo hubiyo ineysan waxyeelo ugeysan adiga iyo ilmahaaga

Badanaa sanado badan ayey qaadataa in tallaalka uu ka soo gudbo tijaabooyin uu u baahan yahay si loo oggolaado in la daah furo oo dadku isticmaali karaan

Waxaa habboon in qofkasta marka uu tallaalka uu qaato haddii uu waxyeelo saa`id ah ka dareemo in uu dib cabasho ugu celiyo xarunta laga soo siiyay isagoo adeegsanaya aqoonsigii uu tallaalka ku soo qaatay

Yaan qaadan Karin tallaalka?

Waxaa jira dad aad u yar oo aan qaadan Karin tallaalka si guudna kumaba haboona tallaaka waxaana kamid ah dadka qaba dareen-celin xasaasiyadeed ee daran iyo dadka hab difaaca jirkoodu uu liito, waxaan habboon in adiga ama ilmahaagaba inta aanad qaadan tallaalka inaad iska hubisaan oo adeeg bixiyayaasha caafimaad aad weydiisaan in tallaalka aad qaadan kartaan iyo inkale

Dhibaatooyinka tallaalka lagala kulmi karo

Intabadan dhibaatooyinka soo raaca tallaalku waa kuwa fudud oo masii raagaan waqti dheer waxaana kamid ah dhibaatooyinkaas cirbadaha tallaalka oo qofka meesha laga siiyo ay midab gaar ah yeelato islamarkaan barar iyo xanuun keenta illaa muddo 2 ama 3 maalin ah, qandho maalin ama laba maalin ah

Intaas iyo inakaleba waa calaamado caadi ah oo la dareemo maalmaha hore ee tallaalka laqaato balse waa kuwa aan sii raagin oo laga bugsoodo

Qubarada caafimaadka ayaa ku talinaya in sara loo qaado ololaha lagu taageerayo sare u qaadidda qaadashada tallaalka si bulshada ay kaga guuleysato cudurrada halista ah ee dhimashada iyo naafeenta sababi kara

Qofkasta waa inuu la socdaa tallaalka caadiga si loo helo sareenta hab difaaca jirka oo u diyaarsan iska caabinta cudurrada halista ah ee dhibaatooyinka dhimashada iyo naafeenta isugu jira u geesta dadka aan tallaalka qaadan

Fadlan qaado tallaalka ilmaahagana tallaal si looga hortago cudurro badan oo tallaal la`aanta darteed u dhibaateeyay malaayiin qof ee ku kala nool dunida daafaheeda iyadoo taas lagu cirib tiri  karo oo kaliya in tallaalka la qaato oo la kordhiyo wacyigalintiisa si dadku uguwada baraarugaan waxtarkiisa