HALISTA CUDURKA JADEECADA!

Jadeecadu waa cudur halis ah oo hawada lagu kala qaado islamarkaana ka dhasha fayras keeni kara dhibaatooyin daran iyo dhimasho

Tallaalka jadeecada ayaa la aaminsan yahay in uu ka hortag u noqday ku dhawaad konton iyo sideed milyan oo dhimasho ah intii u dhexeesay 2000 illaa 2022 inkastoo ay jireen kiisas gaarayay 136000 oo dhimasho jadeecada ay sababtay oo adduunka dhan ah una badnaa caruurta aan la tallaalin ee da`ahaan ka yar 5ta sano

Jadeecadu waa cudur aad loo kala qaado oo si fudud ku faafa marka qof cudurka qaba uu neefsado, qufaco ama hindiso, waxa ayna ku dhici kartaa dadka dhan hase yeeshee waxa ay ku badan tahay caruurt da`doodu yartahay

Cudurku waxa uu ku dhacaa neef mareenka qofka kadibna waxa uu ku faafaa jirka intiisa kale iyadoo calaamadaha lagu garto ay kamid yihiin qandho heerkeedu sareeyo, qufac, diif iyo finan jirka oo dhan ah

Qaadashada tallaalka jadeecada ayaa ah habka ugu wanaagsan ee looga hortagi karo oo dadka qaba ay kaga bugsoon karaan iyo sidookale in aysan ku faafin dadka aan horay u qabin cudurka

Sidaas ookale tallaalku waa badbaado oo waxa uu jirkaaga ka caawinayaa fayraska cudurka isagoo awood dheeri ah ku biirinaya hab difaaca jirkaada taas oo la macna ah in cudurka uusan dhibaato u geesan Karin dadka qaba tallaalka jadeecada

Calaamadaha jadeecada

Calaamadaha cudurka waxa ay soo muuqdaan 10 illaa 14 maalmood kadib marka xanuunku uu ku faafo jirka iyadoo finanku ay yihiin calaamadaha cudurka kuwooda ugu caansan

Sidookale calaamadaha waxa ay socon karaan 4 illaa 7 maalmood waxaana ka mid ah

Diif

Qufac

Indhaha oo cassaan noqda

Baro yar yar oo cad cad iyo inkaloo badan

Dhibaatooyinka ka dhasha cudurka jadeecada waxaa kamid ah

Indho la`aan

Ekfashin ku dhaca maskaxda iyo dhaawac maskaxeed oo ay suurtagal ah

Shuban

Caabuq dhegta ah

Dhibaatooyin xagga neefsashada ah

Haddii haweeney ay ku dhacdo jadeecada xilliga uurka, tani waxa ay khatar ku noqon kartaa hooyada waxa ayna keeni kartaa in ilmaha uur jiifka ah uu dhasho xilli hore oo miisaankiisu hooseeyo

Dhibaatooyinka jadeecada waxa ay ku badan yihiin caruurta da`doodu ka yartahay 5ta sano iyo dadka waaweyn ee da`doodu ka sareyso 30ka sano

Caruurta qaba nafaqa xumida ayaa ah kuwa aad ugu nugul dhibaatooyinka jadeecada gaar ahaan kuwa aan heysan fatimiin A kufilan ama difaaca daciifka ee cudurrada kale

Jadeecada ayaa la aaminsan yahay in ay kamid tahay cudurrada hoos u dhiga hab difaaca jirka taasoo ka dhigan in caruurtu ay aad ugu nugul yihiin dhibaato aad u sareysa oo kaga imaata xanuunkaan

Yaa halis ugu jira cudurkaan?

Qofkasta oo aan difaac laheyn ama aan la tallaalin ayaa qaadi kara cudurka

Caruurta yar yar ee aan la tallaalin iyo hooyooyinka uurka leh ayaa halis ugu jira cudurka jadeecada iyadoo cudurkaan wali uu ku badan yahay afrika, bariga dhexe iyo aasiya

Dhimashada jadeecada ayaa intabadan la sheegaa iney ka dhacdo wadamada dhaqaala ahaan hooseeya taasoo ka dhigan in ay halkaas ku yar tahay dadaalo sare loogu qaadi karo ololo ah in tallaalka cudurka laga dhaqan galiyo maadaama dhaqaale badan uusan jirin

Gudbinta cudurka

Jadeecada waa mid kamid ah cudurrada ugu faafidda badan ee adduunka kuna faafa taabasdhada dheecaanada ka yimaada sanka ama cunaha qofka cudurka qaba iyo neefsashada hawada bukaan qaba jadeecada

Fayraska cudurka ayaa ah mid aad u fur furan oo faafi og waana sababta loo aaminsan yahay in hal qof oo qaba cudurka jadeecada uu u gudbin cudurka 9 qof oo ay isku meel ku nool yihiin waa haddii aysan tallaalka qabin

Daawada cudurka

Ma jirto daaweyn gaar ah oo cudurka hase yeeshee daryeel bixiyaasha caafimaad waa in ay xoogga saaraan yareenta calaamadaha cudurka iyo ka hortagga dhibaatooyinka cudurka

Cabitaanka biyo ku filan iyo daaweynta fuuq baxa ayaa badal u noqon kara dareeraha ka lumay bukaanka intii dhibaatadu ay socotay, cunista cunno caafimaad leh ayaa iyana muhiim ah

Dhakhaatiirtu waxa ay isticmaali karaan daawooyinka qallajiyaasha si ay u daaweeyaan oof-wareenka iyo caabuqyada dhagaha, indhaha

Dhammaan caruurta iyo dadka waaweyn ee qaba jadeecada waa in ay helaan laba qiyaasood oo fatimiin A ah oo dheeri ah oo ay qaataan 24 saacadood oo kala duwan

Tani waxa ay soo celineysaa heerkii yaraa ee fatimiin A ee ku dhaca xittaa caruurta nafaqeysan waxayna sidookale ka caawin kartaa ka hortagga dhawaaca indhaha iyo indha la`aanta

Sidookale waxaa lagu waramayaa in kaabista fatimiin A ay hoos u dhigi karto tirada dhimashada ay sababaan dhibaatooyinka daran ee ka dhasha xanuunka jadeecada

Ka hortagga cudurka

Tallaalka bulshada oo dhan waa habka ugu waxtarka badan ee looga hortago jadeecada

Dhammaan caruurta waa in laga tallaalaa jadeecada

Tallaalku waa badbaado waxtar leh oo aan laga maarmin

Caruurta waa in ay qaataan laba qiyaasood oo tallaalka ah si loo hubiyo difaacooda

Qiyaasta ugu horeysa waxaa badanaa la bixiyaa da`da 9 bilood dalalka jadeecadu ku badan tahay

Qiyaasta labaad waxaa la bixiyaa inta u dhexeesa 15 illaa 18 bilood

Khatarta jadeecada ayaa si gaar ah ugu sareyso xarumaha qaxootiga kuwaas oo ay tahay in sida ugu dhaqsiyaha badan loo tallaalo